Biba Ha'anin Famalao'an!

Ti manuge’ yu’ gi i ma’pos na simåna put I Ha’anin Mannana.

Despues yu’ put este, sa’ achokka’ siña ta sångan na “puru ha’ ginnen i minalago i mangkometsiånte este na ha’ani” i espiritu ni’ ha kekeonra sen maolek sinembatgo.

Gi i todu i kettura siha, ma o’onra i mannana yan i famalao’an, lao pi’ot gi i kutrran “matriarchal” siha, nai ma gof respepeta i bida yan i pusishon i famalao’an. Achokka’ i Españot yan i Amerikånu, annai manhalom siha giya Guahån, ma kefunas este na espiritu gi i ketturan Chamoru, ti kabåles i minalago-ñiha. Olaha mohon yan si yu’us ma’åse na ti ma hulat muna’kabåles este na binaba.

Lao put i esta atrasao-hu, ti bei post på’go put Si nana-hu ha’. Achokka’ nahong i mångge na bidå-ña para bai hu na’bula un miyon na posts put Guiya.

Instead, bai hu post put i fuetsan todu i famalao’an Chamoru, i mampå’go yan i manmo’na.

Eståba yu’ gi i weekend gi halom i mina’tres na dinaña’ Famoksaiyan, Guma’Famoksaiyan: Gathering Strength for the Journey Ahead. Gi este na inetnon, yan siña gi todu i “progressive” na inetnon Chamoru, manmemetgot, manmomo’na yan ti mantulaikayon i famalao’an. Fihu gi i miteng-måmi gi Famoksaiyan, puru ha’ famalao’an, yan tåya’ otro na låhi fuera di Guahu.

Tåya’ guaha este, ti mangkekeha yu’.

Lao gi este na fuetsan på’go, mismo i irensian-ñiha ginnen i manantigu na Chamoru siha.

Pues, bai hu silebra yan onra este na fueinetsa taiguini. Un gof maolek na lepblo mapubliko gi i ma’pos na sakkan, na’ån-ña, “I Manmañaina-ta: I Manmaga’låhi yan I Manmå’gas; Geran Chamoru yan Españot (1668-1695). Si Ed Benavente tumuge’ este yan Si Raphael Unpingco yumungga.

Hamyo ni’ tumaitai put este na tiempo gi i estoria-ta, esta en tingo’ na guaha didide’ pat kana tåya’ infotmashon put i famalao’an Chamoru ni’ manmagas pat maga’håga’ gi duranten i Geran Chamoru yan Españot. Put iyon-ñiha “biases” i Manespañot, ti ma tuge’ ya ti ma rikoknosi i famalao’an Chamoru, ma tuge’ put i lalåhi ha’.

Este na tinige’, tinige’ as Ed, para u eksplika sa’ hafa ta tutungo’ i na’ån-ñiha i manantigu na maga’låhi, lao ti ta tutungo’ i na’ån i manantigu na maga’håga’.

"I Manmaga’håga’ yan Famalao’an gi Todu Islas yan Sengsong Siha"
Maayao ginnen i lepblo:
I Manmañaina-ta: I Manmaga’låhi yan I Manmå’gas; Geran Chamoru yan Españot (1668-1695).
Si Ed Benavente tumuge’ yan Si Raphael Unpingco yumungga.

Mungga hit manmaleffa na para kada Maga’låhi guaha Maga’håga’. Para kada un påtgon guaha nåna yan pusipble nånan biha, lao put rason na patriåtka (patriarchy) i sisteman-ñiha i Españot, nungka na u ma rikoknisa pat u ma tuge’ put i che’cho’-ñiha i famalao’an Chamoru yan i pusishon ni’ ma gogo’te gi lina’la’ i Manchamoru. Gi todu inetnon yan kinalamten Chamoru, i palao’an sumosteteni i familia yan i kuminidåt. Todu i kinalamten kustumbre yan kotturan Chamoru nisisåriu na u faloffan gi Maga’håga’ yan famalao’an i sengsong siha. Ma nota nu i mamale’ i fuetsan famalao’an, annai despues di i Gera ma sodda’ na makkat manmafa’nå’gue i mansotterita put obligashon-ñiha gi assagua yanggen umakkamo’:

“[because]…in the house of their parents they were used to seeing that the head of the household was the woman, she ordering and the husband obeying.”

Ta rikoknisa yan ta abiba na gi todu i Gereru yan Manmaga’låhi ni’ manmatai gi durånten i Geran Chamoru yan Españot, i mañainå-ta, i famalao’an kumakåtga’ mo’na todu i piniti, minasa’pet, chini’ot yan chinatsaga’. Siha humåhafot i lalåhin-ñiha yan i asaguan-ñiha ni’ mamomoddong gi durånten gera. Siha kumåkatga’ i lenguåhi yan kottura mo’na. Siha mo’na lå’la i Chamoru na rasa yan siha muna’pusipble na u guaha tinaotao Chamoru på’go. Saina Ma’åse para todu famalao’an Chamoru.

Biba Famalao'an Chamoru!!